Yazı masası hər bir yazıçı üçün haradasa savaş meydanı kimi bir yerdi. Bu mübarizədən məğlub, yoxsa qalib ayrılacaq? Yazıçı bu sualın cavabını zamanın öhdəsinə buraxır...
Mərhum Xalq yazıçısı Sabir Əhmədlinin iş otağını ziyarət edərkən yazıçı və zaman adlı əbədi vəhdətin canlı şahidinə çevrilirsən. Yazıçının oğlu Etibar Əhmədovla Sabir Əhmədlinin sənət dünyasına səyahət edirik.
“Hər gün atamla danışıram”
– Axşamlar atamın iş otağına keçirəm. Hərdən yazı masasının arxasında, hərdən də bu divanda oturub keçmişlə salamlaşır, atamla söhbət edirəm. Rəfdə olanlar atamın oxuduğu və yazdığı kitablardı. Əsərlərini oxuya-oxuya atamla dərdləşirəm. “Dünyanın arşını”ndan tutmuş “Yazılmayan yazı”ya qədər bütün əsərlərini ardıcıllıqla oxuyuram. Bu zaman elə bilirəm, atam mənimlə danışır, əvvəlki kimi öyüd-nəsihətlərini verir...
Etibar müəllim susub gözlərini bir nöqtəyə zilləyir. İndi də gün batmaq üzrədir. Mərhum yazıçının iş otağında, yazı masasının ətrafında oğlu ilə söhbətimizə davam etdiyimiz zaman ikimiz də anlayırıq ki, sanki Sabir Əhmədli özü də yazı masasının arxasından bizi dinləyir və Etibar müəllimin yazı masasına zillənən baxışlarının sirri açılır. Demək, onlar hər gün beləcə danışırlar...
Sabir Əhmədlinin iş otağındakı yazı masası, onun üstündə olan kompüter, qələmdan yazıçının sadiq dostları olub. Masadan azacıq kənarda olan kitab rəfi də yazıçının köhnə simsarıdır. Kitabları rəfə özü bircə-bircə düzüb. Rəfin üstündə də yazıçıdan xatirə kimi nərd, köhnə masaüstü saat, iki böyük xəncər və təsbehlər var. Yazı makinası isə bir kənara qoyulub. Oğlu deyir ki, atası bu makina ilə hələ sağlığında vidalaşmışdı:
– Əsərlərinin çoxunu köhnə evimizdəki iş otağında yazıb. Prezidentimiz sağ olsun, bu mənzili bizə hədiyyə etdi. Sonrakı yazılarını bu otaqda, bu yazı masasının arxasında yazdı. Kompüteri də ona hədiyyə etmişdilər. Yeniliklərə meyilli adam idi. Ona görə də yazı makinasını bir kənara qoyub kompüterlə yazmağa başladı. Sonuncu əsərini kompüterdə yazdı.
Bu otaq, bu yazı masası atam üçün həmişə məhrəm bir yer olub. Ora hər adamı buraxmırdı. Seyran Səxavət deyir ki, Sabir Əhmədliyə nə qədər yaxınlaşsan da, müəyyən bir hədd var idi ki, ondan o tərəfə gedə bilməzdin. İş prosesində mütləq sakitlik olmalı idi.
“Toğana” və “Yamacda nişanə” kimi əsərlərində təsvirlər yazıçının təbiətlə təmasının bədii zirvəsidir. Etibar müəllimin danışdığı bir əhvalat isə bu bağlılığın kədərli sonluğunu anladır. Hər şey yenə bu otaqda baş verir. Yazı masasının arxasındakı pəncərədən həyətə baxan yazıçının baharın ən xoş çağında çiçəkləri ilə gəl-gəl deyən ağacı qurumuş ağac kimi görməsi artıq hər şeyin sonu demək idi. Hər zaman təbiətə can atan və onun bir parçasına çevrilmək istəyən yazıçı bu yazı masasının arxasında həmin ağacla birlikdə özünün də sonunun gəldiyini oğluna deyibmiş:
– Atamın yazı masası arxasındakı son günləri indiki kimi yadımdadı. Çox ləng yazırdı, əsasən, köhnə yazılarını sahmana salırdı. Əvvəllər bu masanın arxasında çox məhsuldar işləyərdi. Sübh tezdən və axşamlar yazardı. Bu otağın, bu masanın, elə bu rəfin, nə qədər desən, acılı-şirinli xatirəsi var. Bu otaqda atamla etdiyim son söhbəti yaxşı xatırlayıram. Çox kövrəlmişdi, bədbin danışırdı. Yaz ayları idi. Onu pəncərənin kənarına gətirib dedim ki, bu gözəlliyə, çiçəkləyən ağaclara bax. Dedi, oğlum, mən daha bu gözəlliyi görə bilmirəm.
Cəbrayıldan gələn qələmdan
Sabir Əhmədlinin kitabxanasına baxırıq. Dünya və Azərbaycan ədəbiyyatından tutmuş, müxtəlif qəzet və jurnal nüsxələrinəcən hər şey səliqə ilə düzülüb. Etibar müəllim Şah İsmayıl Xətainin qoşma, gəraylı və qəzəllərdən ibarət kitabına baxıb maraqlı bir epizodu danışır. Deyir, atası bu kitabda bir fikrə rast gəlib. Xətai yazıbmış ki, atasını bələkdə görüb. Necə yəni atasını bələkdə görüb?! Deməli, Xətai zaman məfhumunu qabaqlayıb, atası ilə paralel zamanda yaşayıb. Ümumiyyətlə, yazıçı belə sirli məqamlara böyük maraq göstərib. Oğlu yenidən yazı masasına yaxınlaşıb oradakı qələmdanı əlinə alır.
Demə, bu qələmdanın alt hissəsi Cəbrayıl mərmərindən düzəldilib. Sabir Əhmədli hər dəfə yazıya qələmi o mərmərin üzərindən götürüb başlarmış. Yazıçı sanki bununla təsəlli taparmış – qələmi doğma torpağın bir parçasından ayırıb yenidən ora qaytarmaqla...
– Hə, bu qələmdana xüsusi rəğbəti var idi. Çünki Cəbrayıl mərmərindən hazırlanıb ona hədiyyə edilmişdi.
Yazı masasına tapınmaq
Yazıçı həyatının ən xoş və ən ağır günlərində bu yazı masasına tapınıb. Etibar Əhmədov deyir ki, atası 1988-ci il hadisələri zamanı tez-tez meydana gedirdi. Orada Sabir Rüstəmxanlı, Xəlil Rza Ulutürk kimi şairlərin kütləyə necə müraciət etmələrindən danışırdı. Deyirdi ki, özü tribunaya qalxıb onlar kimi danışa bilməz. Odur ki, yazı masası onun üçün haradasa tribunanı əvəzləyib. Xalqa buradan müraciət edib. “Dünyanın arşını”nın nə boyda olduğunu göstərib, dünyanı “Yaşıl teatr” kimi görə-görə və “Axirət sevdası”ndan heç vaxt əl çəkməyib. Həyatındakı haqsızlıqlar və faciələr onu yazı masasına bir az da doğmalaşdırıb.
Cəbrayıl işğal ediləndə, oğlu Məhəmməd 24 yaşında o torpaqlar uğrunda şəhid olanda, haqsızlıqlarla üzləşəndə öz yazı masasına pənah gətirib.
Elmin NURİ